Mat 16 | BEF | STEP | Felosi bona'i to Satusi bona'i yabe nelana hiti luga'a enali Yesutoga elete fi taga hu etalune'mu hi'ahana. Enali: Kokulumalugu topa hose'na mone li huto hitogo bu galune li'ahana.

Matthew 16

Topa hose'na bu galune'mu li nupa hi'ahana

Mk 8:11-13; Lk 12:54-56

1 Felosi bona'i to Satusi bona'i yabe nelana hiti luga'a enali Yesutoga elete fi taga hu etalune'mu hi'ahana. Enali: Kokulumalugu topa hose'na mone li huto hitogo bu galune li'ahana. 2 Ya lago Yesu ka'anilo nona'a lu epi'ehina: Utehi yege limi falalube'mu nohuto kokuluma'i fi beyege toloto safa logo nohigomo lenali bati huto yago yege lalinagi lite lilata nehabe. 3 To etehi sopohi giloto kokuluma'i safa logo nohigomo yasi hiti ko'i yatai ilibe lite lilata nehabe. O'yo, lenali bati hite kokulumamofihi meha'a be gelete loko hilata nehabe. Ya nehana lenali yatai kanamofihi meha'a be gelete loko mehilana nehabe. 4 Lenali bati mehana boana moko fako lite neminana boana'magita nani kumu'i topa hose'na li huto hu lubulo molobo nelabe. Ya nelana nani topa hose'na mone li huto hu lenubulo memalaluna'mu yabe. Lenali koyapa bo Yona huto hu'ehinanamofihi topa hose'na'ago anasi bu galana'mu yabe. Ya luto luloto Yesu he'mi epololoto bu fa hu'ehina yabe.

Felosi bomagi hiti to Satusi bomagi hiti hapa'ani yabe

Mk 8:14-21

5 Enali Yesuhi koko pana'amagi botigu tite hefuhu nagami'i helekete nebitemo enekesu hago beleti nose'na mone'a melise bi'ahana yabe. 6 To Yesu ma luto lu epi'ehina: Lenali kaba hu bati hilo. Lenali Felosi bona'i hiti to Satusi bona'i hiti enali yisiti legita hapa'anilo kaba hu bati hilo. 7 Ya ligo enali'ani ma lite musi musi ka li'ahana: Lali beleti melise o'ohuta kamo'mu nolibe. 8 Ya lana kaga'ani Yesu akeheliloto ma luto lu epi'ehina: Kaga keheli bebe sose'natini nesi'asi ni'i lepalana bo hena hibe lite lali beleti lito meo'ohune ya lite musi musi ka nelabe? 9 Lenali keheli bati mehi'ahafihe? 5000 bonato to 5 beleti gofa gofa ho'ohunamoba lenali lenekesu ho'ehifihe? Henaki'a safegu letuha'a li bai te'ahana ni'ibe? 10 To 7 beleti 4000 bomagi epugo ne'ahana kagamoba lenekesu ho'ehifihe? To henaki'a sepeke'nagu letuha'a li bai te'ahana ni'ibe? 11 Beleti nose'namu melu'ohuna. Lenali hena hibe lite mekeheli'ahabe? Lenali Felosi bo hiti Satusi bomagihi yisiti suhi luto fagalo hapa'ani ni'inagi kaba hu bati hilo. 12 Ya ligo enali beletimofi yisitimu'i kaba hu bati hilo melibe. Ai Felosi bomagi hiti to Satusi bomagihi kaga'anilo kaba hu bati hilo luto nolinagi lite enekesa yigi fe li'ahana yabe.

Pitau Yesuhi Hu'mau ho lifi'ehina bo yabe lu'ehina

Mk 8:27-30; Lk 9:18-21

13 Yesu Sisalia Filipai kegi'a buloto ya'mana kanalo koko pana'a ma luto enoloka ho'ehina: Asaga boana'magi Kokulumaguti limi'ehina Bo kumu'i hena hibe lite lilata nehabe? 14 To enali lu emi'ahana: Luga'a bona'magi Yoniu nagami folo epolose bo nohibe nelabe. To luga'a bona'magi Elaiyau nohibe nela. To luga'amagi ai Yelemaiya nohifi fato lu huto huto bo nohifi lite lilata nehabe. 15 Ya lago Yesu lu epi'ehina: To lenalitini nani kumu'i kiyi'afube lite nigi'ni nehabe? 16 Ya ligo Simoni Pitau ka'alo nona'a lu'ehina: Kai Hu'ma nominanamofihi pana'a le'mo ho ti'ehina bo Mesia nohane. 17 Ya ligo Yesu lu emi'ehina: Simonio, kai Yonihi pana'a yale. Kai kegelo bibo. Ma melugu bo moneuba ya'ma lamana kaga mekelepi'ehinagi Afo'nifu kokulumalugu nohinauba ai'a kelepi'ehigo ya'ma kaga nolane. 18 Ya hanogo nani lu nokumube: Pita, kaiya efa tegi suhi luto nohane. Ya hu'ahatago ya'mana efato nani mono noha'ni giluna'mu yabe. Filise'namofihi amuya'auba be megilina'mu yabe. 19 To nani kokuluma kapolo hokolo hilatanafi to hekini lolatanafi kimiluna'mu yabe. To kai ma melugu nominotoka hapa'a mone hekini loto lu laga hu epelenogo kokulumalo bo, Hu'mau ana huto lu laga hilina'mu yabe. To ma melugu nominotoka hapa'a mone hokolo hu epelenogo kokulumalo bo, Hu'mau ana huto hokolo hilina'mu yabe. 20 To Yesu koko pana'a amuya luto enekesa bi'ehina: Nani kumu luto lenali Hu'mau ho lifi'ehina pana'i Mesia nohibe lite lu yege hete asaga bona'i lu meepilo.

Yesu gabu'i ginogo fililinamofihi ka'a lu'ehina

Mk 8:31-9:1; Lk 9:22-27

21 Yana kana'alo Yesu koko pana'a kaga hapi fito lu hokolo huto lu epi'ehina: Nani Yelusale hepatoga buloto'ni enikibina bo, sipi mono bo to keya ka tisa bo enalitogati nagabu foya li kofilube. Enali noho fililenogo yege loebe monebe minoloto'ni aku'i ho tiluna'mu yabe. 22 Ya ligo Pitau le'mo beletoga moloto amuya ka emekiloto ma luto lu emi'ehina: Sipi Bo, enali ya mehi ketalana'mu yabe. Ya'mana suhi kaitoga huto mehilina'mu yabe. 23 To Yesu i behe huto Pitahi bu goloto ma luto lu emi'ehina: Sata, kai nanitogati bufa hubo. Kai kapo biluna'a hekini lo netalube'mu nohapihe? Kai kaga nolataya ma melugu bona'magihi kaga nolane, to ai Hu'mamofitogati meo'ehibe.

24 Yalo Yesu koko pana'a ma luto lu epi'ehina: Bo moneuba nani'i hiti bilube lutomo ai'a gufa'amu ekesa meyigise malipu yafa'a lito kofiloto nemege'i meleno. 25 To bo moneuba ai'a gufa'a li buto bito koli koli huto minalina ai gufa'amofihi mino kosaba huse'na'a minigilina'mu yabe. To bo moneuba nani kumu luto gufa'a he'milina alihi ai gufa'amofihi mino kosaba huse'na'a aku'i lilina'mu yabe. 26 To bo moneuba ma melugu asaga fe'nohi ninana lilube luto lilinaya to ai'a meha'a minigilibe. Ya hinogo asaga fe'nohanauba hena huto li buto bito he'malina ni'ibe? To bouba hena mina'a he'mito meha'a aku'i lilina ni'ibe? 27 Kokulumaguti limi'ehina Bouba Afo'afihi fana mehena'a hiti aku'i noenogo to agelo'a hiti alana'mu yabe. Ya hilina yupahi asaga boana'magi fato fato suhi hi'ahana hapa hapa'animofihi nona'a li yege ho epalalina'mu yabe. 28 Nani ma'naka lu nolepube. Bo luga'a ma ho tilete nehanaguti mefilise nehite bu ge'ehinogo Kokulumaguti limi'ehina Bouba kibina bo lolo huto minoloto aku alina'mu yabe.